काठमाडौं, ३ जेठ । प्रमुख प्रतिपक्षी नेपाली कांग्रेसको अवरोध कायमै रहेपछि राष्ट्रिय सभाको बैठक स्थगित भएको छ ।

अध्यक्ष दाहालले राष्ट्रिय सभा बैठक शुक्रबार ४ गते दिउँसो १ बजेर १५ मिनेटमा बस्ने गरी स्थगित गरेका छन्।

अध्यक्ष नारायणप्रसाद दाहालले बिहीबार अपराह्न बैठक सुरू गर्नेबित्तिकै कांग्रेस सांसदहरू उठेर विरोध गरेका थिए । अध्यक्ष दाहालले बैठक सञ्चालनका लागि सहयोग गरिदिन कांग्रेस सांसदहरूलाई आग्रह गरेका थिए । तर, कांग्रेस सांसदहरू आसनमा नबसेपछि अध्यक्ष दाहालले जेठ ४ गते बस्नेगरी बैठक स्थगित भएको घोषणा गरे ।

कांग्रेसले अघिल्लो अधिवेशनदेखि नै सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै संसदीय छानबिन समिति गठनको माग गर्दै आएको छ । उक्त मागमा सत्ता पक्ष तयार नभएपछि कांग्रेसले राष्ट्रिय सभामा पनि अवरोध गर्दै आएको छ ।