काठमाडौं, ३ जेठ । राष्ट्रपति रामचन्द्र पौडेलले स्विट्जरल्याण्ड र जर्मनीको भ्रमण गर्ने भएका छन् । परराष्ट्र मन्त्रालयका प्रवक्ता अमृतबहादुर राईले जेनेभामा आयोजना हुने आइएलओको वार्षिक उत्सवमा भाग लिनका लागि पौडेल जान लागेका जानकारी दिए ।

उनले भने, ‘जुनको दोस्रो हप्तातिर हो जस्तो लाग्छ, मितिको बारेमा औपचारिक जानकारी आउन बाँकी छ । आइएलओको वार्षिक उत्सवमा राष्ट्रपति पौडेलले सम्बोधन गर्ने कार्यक्रम रहेको छ ।’

राष्ट्रपति पौडेलको युरोप भ्रमण यस अघि नै तय भइसकेको थियो । तर, उक्त भ्रमण भूकम्पका कारण स्थगित भएको थियो । गत कात्तिक २२ गतेदेखि १० दिनका लागि फ्रान्स, इटली र जर्मनीको भ्रमण तय गरिएको थियो । मन्त्रिपरिषद्को बैठकले उक्त भ्रमण स्वीकृत गरेको भोलिपल्ट जाजरकोट केन्द्रबिन्दु भएर गएको विनाशकारी भूकम्पका कारण स्थगित भएको थियो ।

परराष्ट्र मन्त्रालयका अनुसार अहिलेको भ्रमणको तयारी चलिरहे पनि समय भने तय भइसकेको छैन । स्विटरल्याण्डबाट उनी जर्मनी पनि जाने कार्यक्रम रहेको परराष्ट्र मन्त्रालयले जनाएको छ ।