काठमाडौं, ३० भदौ । राष्ट्रिय स्वतन्त्र पार्टी (रास्वपा)की सांसद समीक्षा बास्कोटाले भोटेकोसी बाढीबाट उद्धार गरिएका व्यक्तिहरूको अस्पतालको आईसीयू कक्षमै अन्तर्वार्ता लिइएको घटनाप्रति आपत्ति जनाएकी छन् ।

उनले विपद्का बेला स्वास्थ्य पत्रकारिताको सीमा र आईसीयूभित्र अन्तर्वार्ता लिन तथा दिन अनुमति दिने अभ्यासको नैतिकतामाथि प्रश्न उठाएकी हुन् ।

बास्कोटाका अनुसार आईसीयूमा बिरामीका आफन्तलाई समेत निश्चित स्वास्थ्य प्रोटोकल र समयअनुसार मात्रै प्रवेश दिइने अवस्थामा मिडियालाई अन्तर्वार्ताका लागि अनुमति दिनु गम्भीर विषय हो ।

उनले प्रश्न गरिन्, ‘आईसीयूमा अन्तर्वार्ता लिएका दुई बिरामी मात्रै हुनुहुन्थ्यो कि अरू बिरामी पनि थिए ?’ अन्य बिरामीसमेत रहेको भए उनीहरूको स्वास्थ्य र सुरक्षालाई जोखिममा पार्न मिल्ने वा नमिल्नेबारे उनले सम्बन्धित पक्षसँग जवाफ मागिन् ।

अन्तर्वार्ताका लागि अनुमति दिने चिकित्सक तथा सम्बन्धित निकायले सम्भावित जोखिमबारे पर्याप्त गम्भीरता अपनाए कि अपनाएनन् भन्ने विषयमा पनि छानबिन हुनुपर्ने उनको भनाइ छ ।