काठमाडौं, १४ असार । त्रिभुवन विश्वविद्यालय शिक्षण अस्पताल महाराजगञ्जले नेपाल सरकारको स्वास्थ्य बीमा सेवाअन्तर्गत ओपीडी (बहिरंग) सेवा पुनः सञ्चालन गर्ने भएको छ ।

अस्पताल प्रशासनले एक सूचना जारी गर्दै स्थगित रहेको बीमा सेवा यही असार १५ गते (भोलि)देखि पुनः सुरु हुन लागेको जानकारी दिएको हो ।

अस्पतालले लामो समयदेखि बीमा बोर्डले दाबी भुक्तानी नगरेको भन्दै १ माघ २०८३ देखि उक्त सेवा बन्द गरेको थियो ।

सूचना अनुसार स्वास्थ्य बीमा अन्तर्गतको ओ.पि.डी. टिकट वितरणका लागि दुईवटा समय तालिकाहरू निर्धारण गरिएको छ । जसअनुसार सेवाग्राहीहरूले बिहान ७ः०० बजेदेखि ११ः०० बजेसम्म र दिउँसो १ः०० बजेदेखि २ः३० बजेसम्म बीमा टिकट काउन्टरबाट टिकट लिन सक्नेछन् ।

बिमा सम्बन्धी थप जानकारी वा कुनै समस्या परेमा सेवाग्राहीहरूले अस्पतालको स्वास्थ्य बीमा तथा सामाजिक सुरक्षा शाखामा सम्पर्क गर्न सक्ने अस्पतालले जनाएको छ । त्यसका लागि शाखा प्रमुख डा. भावना घलेलाई सम्पर्क व्यक्तिका रूपमा तोकिएको छ ।