काठमाडौं । नेपालस्थित अमेरिकी दूतावासले सर्वसाधारण दर्शकहरूसँग मिलेर फिफा विश्वकप २०२६ अन्तर्गत अमेरिका र पाराग्वेबीचको खेलको सामूहिक अवलोकन (वाच पार्टी) आयोजना सम्पन्न गरेको छ ।

काठमाडौंको अलफ्ट होटलमा शनिबार आयोजित उक्त कार्यक्रममा अमेरिकी दूतावासका प्रतिनिधिहरू तथा फुटबलप्रेमीहरूको उल्लेखनीय सहभागिता रह्यो ।

अमेरिकी दूतावासका अनुसार फिफा विश्वकप २०२६ इतिहासकै पहिलो विश्वकप हुनेछ, जसमा ४८ वटा राष्ट्रिय टोली सहभागी छन् । साथै, यो प्रतियोगिता पहिलो पटक संयुक्त रूपमा तीन राष्ट्र (संयुक्त राज्य अमेरिका, क्यानडा र मेक्सिको)ले आयोजना गर्न लागेका छन् ।

प्रतियोगिताअन्तर्गत १०४ खेलमध्ये ७८ खेल अमेरिकाका ११ वटा शहरमा सञ्चालन हुनेछन् । प्रतियोगिताका अन्तिम चार चरणका खेलहरू समेत अमेरिकामै आयोजना गरिनेछ । सन् १९९४ पछि अमेरिकाले दोस्रो पटक पुरुष फुटबल विश्वकपको आयोजना गर्न लागेको हो ।

शनिबार बिहान लस एन्जलस स्टेडियममा सम्पन्न समूह ‘डी’ अन्तर्गतको खेलमा अमेरिकाले पाराग्वेलाई ४–१ गोल अन्तरले पराजित गरेको थियो ।