काठमाडौं, २७ वैशाख । लेबनानमा इजरायली सेनाको पछिल्लो हवाई आक्रमणमा एकै दिन कम्तीमा ३९ जनाको मृत्यु भएको छ ।

लेबनानी स्वास्थ्य मन्त्रालयका अनुसार दक्षिणी सहर सक्सकियेहमा भएको आक्रमणमा एक बालिकासहित सात जनाले ज्यान गुमाएका छन् भने १५ जना घाइते भएका छन् । घाइतेमध्ये तीन जना बालबालिका रहेका छन् ।

इजरायली रक्षा बल (आईडीएफ)ले आफूहरूले लेबनानी सशस्त्र समूह हिजबुल्लाहलाई लक्षित गरेर आक्रमण गरेको जनाएको छ । साथै सर्वसाधारण नागरिक प्रभावित भएको खबरबारे जानकारी रहेको पनि बताएको छ ।

अमेरिकी राष्ट्रपति डोनाल्ड ट्रम्पले १६ अप्रिलमा इजरायल र लेबनानबीच युद्धविराम सम्झौता घोषणा गरेका थिए, तर इजरायली सेना र हिजबुल्लाहबीच आक्रमण–प्रत्याक्रमण जारी छ ।

इजरायलले पछिल्ला अधिकांश हवाई आक्रमण दक्षिणी लेबनानमा गरेको छ । उसले हिजबुल्लाहसँग सम्बन्धित पूर्वाधार र व्यक्तिलाई निशाना बनाइएको दाबी गरेको छ ।

आईडीएफले भने उक्त क्षेत्रमा सैन्य प्रयोजनका लागि प्रयोग भइरहेको भवनभित्र रहेका हिजबुल्लाह लडाकुलाई निशाना बनाइएको दाबी गरेको छ । नागरिक क्षति कम गर्न सटीक हतियार र हवाई निगरानी प्रयोग गरिएको पनि जनाएको छ ।
यसैबीच नाबाटियेहमा मोटरसाइकललाई लक्षित गरेर गरिएको अर्को आक्रमणमा एक सिरियाली नागरिक र उनकी १२ वर्षीया छोरी परेका थिए । स्वास्थ्य मन्त्रालयका अनुसार पहिलो आक्रमणपछि उनीहरू भाग्न खोज्दा ड्रोनले दोस्रो पटक आक्रमण गरेको थियो । त्यसपछि बालिकालाई तेस्रो पटक प्रत्यक्ष निशाना बनाइएको बताइएको छ । बालिकाको जीवन बचाउन शल्यक्रिया भइरहेको मन्त्रालयले जनाएको छ ।

उता हिजबुल्लाहले पनि उत्तरी इजरायलमा ड्रोन आक्रमण गरेको छ । इजरायली सेनाका अनुसार उक्त आक्रमणमा तीन सैनिक घाइते भएका छन्, जसमा एक जनाको अवस्था गम्भीर छ ।

लेबनानको स्वास्थ्य मन्त्रालयका अनुसार पछिल्लो एक सातामा इजरायली आक्रमणमा महिला र बालबालिकासहित १२० भन्दा बढी मानिस मारिएका छन् । मन्त्रालयले सर्वसाधारण र लडाकु छुट्याएर तथ्यांक सार्वजनिक गरेको छैन ।

इजरायली सेना अझै पनि सीमा क्षेत्रमा लेबनानी भूभागको केही हिस्सा कब्जामा राखिरहेको छ । इजरायलले त्यस क्षेत्रलाई “हिजबुल्लाह–मुक्त सुरक्षा क्षेत्र” बनाउने उद्देश्य रहेको जनाएको छ ।

ती क्षेत्रमा धेरै गाउँ पूर्ण रूपमा ध्वस्त पारिएको छ । मानवअधिकार समूहहरूले केही घटनालाई युद्ध अपराधको रूपमा लिन सकिने बताएका छन् ।