काठमाडौं, २५ वैशाख । जल तथा मौसम विज्ञान विभागले यो वर्षको मनसुनमा देशका अधिकांश स्थानमा सरदरभन्दा कम पानी पर्ने प्रक्षेपण गरेको छ । शुक्रबार मनसुन आंकलन सार्वजनिक गर्दै विभागले जेठ १८ देखि असोज १४ सम्मको चार महिनाको मनसुन ऋतुमा देशका अधिकांश स्थानमा सरदर भन्दा कम वर्षा हुने प्रक्षेपण गरेको हो ।

कर्णाली प्रदेशका दक्षिणी भू–भाग, लुम्बिनी प्रदेशका अधिकांश भू–भाग, मधेश प्रदेशका पूर्वी भू–भाग र कोशी प्रदेशका दक्षिणी भू–भागमा सरदर भन्दा कम वर्षा हुने संभावना ५५ प्रतिशत देखि ६५ प्रतिशतत रहेको रहेको विभागले जनाएको छ ।

त्यस्तै, सुदूरपश्चिम प्रदेशका अधिकांश भू–भाग, मधेश प्रदेशका पश्चिमी भू–भाग र कोशी प्रदेशका मध्य भू–भागमा सरदर भन्दा कम वर्षा हुने संभावना ४५ देखि ५५प्रतिशत रहेको छ । त्यसैगरी कर्णाली प्रदेशका उत्तरी भू–भाग तथा कोशी प्रदेशका उत्तरी भू–भागमा सरदर वर्षा हुने सम्भावना ३५ देखि ४५ प्रतिशत रहेको छ भने देशका बाँकी भू–भागमा सरदर भन्दा कम वर्षा हुने सम्भावना ३५ देखि ४५ प्रतिशत रहेको विभागको प्रक्षेपण छ ।

यो वर्ष अधिकतम तथा न्यूनतम तापक्रम पनि देशभर सरदरभन्दा बढी रहने सम्भावना रहेको विभागअन्तर्गत मौसम पूर्वानुमान महाशाखाले जनाएको छ । महाशाखाका अनुसार गर्मी बढी हुने सम्भावना देखिएको छ ।

सुदूरपश्चिम प्रदेशका उत्तर–पूर्वी भू–भाग, कर्णाली प्रदेशका उत्तरी भू–भाग, लुम्बिनी प्रदेशका पश्चिमी भू–भाग, गण्डकी प्रदेशका उत्तर–पूर्वी तथा दक्षिणी भू–भाग, बागमती प्रदेशका पश्चिमि भू–भाग, मधेश प्रदेशका पूर्वी तथा पश्चिमी भू–भाग र कोशी प्रदेशका पूर्वी तथा दक्षिणी भू–भागमा अधिकतम तापक्रम सरदर भन्दा बढी हुने संभावना ५५ प्रतिशत देखि ६५ प्रतिशत रहेको विभागले जनाएको छ ।

त्यस्तै, कोशी प्रदेशका मध्य भू–भाग तथा सुदूरपश्चिम प्रदेशका पूर्वी भू–भागमा अधिकतम तापक्रम सरदर भन्दा बढी रहने संभावना ३५ देखि ४५ प्रतिशत रहेको छ भने देशका बाँकी भू–भागमा सरदर भन्दा बढी हुने सम्भावना ४५ देखि ५५ प्रतिशत रहेको छ ।

गत वर्ष २०८२ को मनसुन ऋतुमा देशका अधिकांश स्थानहरुमा सरदर भन्दा बढी तथा मधेश प्रदेशका पूर्वी तथा दक्षिणी भू–भागमा सरदर वर्षा हुने प्रक्षेपण गरिएको थियो, जसमा देशका धेरैजसो केन्द्रहरुमा सरदर भन्दा कम देखि सरदर बर्षा र केही केन्द्रमा सरदर भन्दा बढी वर्षा मापन गरिएको थियो । त्यस्तै, देशका अधिकांश स्थानमा तापक्रम सरदर भन्दा बढी हुने आँकलन गरिएकोमा अधिकांश स्थानहरुमा सरदर भन्दा बढी अधिकतम तथा न्यूनतम तापक्रम मापन गरिएको थियो ।