काठमाडौं, १३ वैशाख । मनोहरा खोला किनारको सुकुम्बासी बस्तीमा बनाइएका अनधिकृत घरटहरा हटाउने काम सुरु भएको छ । आज बिहानदेखि भक्तपुरबाट खटिएका करिब १ हजार ९०० नेपाल प्रहरी र सशस्त्र प्रहरीको उपस्थितिमा संरचना भत्काउन थालिएको प्रहरीले जनाएको हो ।

बस्तीवासीलाई बिहान ९ बजेसम्म आफैं घरटहरा हटाउने समय दिइएको थियो । त्यसपछि काठमाडौं महानगरपालिकाको डोजरसहितको टोलीले हटाउने काम अघि बढाएको हो ।

प्रहरीका अनुसार अधिकांश घरबाट सामान सारिसकेपछि भत्काउने प्रक्रिया सुरु गरिएको छ । उक्त क्षेत्रमा ७७७ घरटहरा रहेका छन् । यसअघि शनिबार सात वटा पक्की घर हटाउँदा झडप भएको थियो, जसमा २२ सुरक्षाकर्मी घाइते भएका थिए ।