काठमाडौं, १० भदौ । सरकारले १० अर्ब रुपैयाँ आन्तरिक ऋण उठाउन विकास ऋणपत्र जारी गर्ने तयारी गरेको छ । सार्वजनिक ऋण व्यवस्थापन कार्यालयले ३ वर्षका लागि विकास ऋणपत्र २०८५ ‘ढ’ बोलकबोलमार्फत् बिक्री गर्ने भएको हो ।

कार्यालयका अनुसार ऋणपत्र खरिद गर्न इच्छुक बैंक, वित्तीय संस्था, व्यक्ति, फर्म वा कम्पनीले भाद्र ११ गते बुधवार बिहान १० बजे देखि दिउँसो ३ बजेसम्म बोलकबोल गर्न सक्नेछन् ।

ऋणपत्र खरिदका लागि बोलकबोल अनलाइन प्रणालीमार्फत पेश गर्नुपर्नेछ । ऋणपत्रको सावाँ भुक्तानी २०८५ भाद्र १२ गते हुनेछ भने ब्याज अर्धवार्षिक रूपमा प्रदान गरिनेछ । ब्याजमा आयकर लागू हुनेछ ।

बोलकबोलमा आएको ब्याजदरलाई सानोदेखि ठूलो क्रममा क्रमबद्ध गरी, बाँडफाँट हुने रकम अनुसार ‘कट अफ’ ब्याजदर तय गरिनेछ । यस कट अफ ब्याजदरमा ऋणपत्र खरिद गर्न सकिनेछ ।

बैंक तथा वित्तीय संस्था, गैर–बैंक वित्तीय संस्था, बीमा कम्पनी, अन्य संस्थाहरु र नेपाली नागरिकले बोलकबोलमा भाग लिन सक्नेछन् । ऋणपत्र धितो राखेर कर्जा लिन र दिन पनि सकिनेछ ।

प्रतिष्पर्धी र अप्रतिष्पर्धी बोलवालालाई क्रमशः ८ अर्ब ५० करोड र १ अर्ब ५० करोड रुपैयाँ छुट्याइएको छ । अप्रतिष्पर्धी बोलवालाबाट बाँकी रकम नआएमा त्यसलाई प्रतिष्पर्धी बोलवालामा वितरण गरिनेछ । यदि अप्रतिष्पर्धी बोलवालाबाट बढी रकमको बोल प्राप्त भयो भने समानुपातिक रुपमा बाँडफाँट गरिनेछ ।

बोलकबोल ५० हजार रुपैयाँको वृद्धिमा पेश गर्नुपर्नेछ र कुल निष्कासन रकमभन्दा बढी नपर्नुपर्नेछ । व्यक्तिहरु वा संस्थाले प्रतिष्पर्धी वा अप्रतिष्पर्धी मध्ये केवल एक प्रकारको बोलवालाको रुपमा भाग लिन सक्नेछन् । राष्ट्र बैंकबाट इजाजत प्राप्त वाणिज्य बैंक, विकास बैंक र वित्त कम्पनीले अप्रतिष्पर्धीको रुपमा भाग लिन सक्दैनन् ।