काठमाडौं, १४ जेठ । राजतन्त्र पुनःस्थापनाका लागि आन्दोलनरत संयुक्त जनआन्दोलन समितिले भोली (जेठ १५ गते) हुने प्रदर्शनलाई मानवअधिकारवादी संघ संस्था र सञ्चार जगतलाई चनाखो भएर अनुगमन गर्न अपिल गरेको छ । तीनकुने घटनामा जस्तै सरकारको नियोजित दमनको सम्भावना देखिएको भन्दै मानवअधिकारवादी संघ संस्था र सञ्चार जगतलाई चनाखो भएर अनुगमन गर्न अपिल गरेको हो ।

‘प्रधानमन्त्री केपी ओलीको जेठ १५ गते काठमाडौँ नियन्त्रणमा लिने घोषणा र सरकारका प्रवक्ताबाट आन्दोलनलाई प्रतिबन्ध लगाउने धम्की, सरकारले फेरि पनि मानवअधिकार, प्रजातान्त्रिक हक अधिकार कुण्ठित गर्न सक्दछ भन्ने आधारहरू हुन्,’ समितिले बुधबार जारी गरेको विज्ञप्तिमा भनिएको छ, ‘तीनकुने घटनामा जस्तै सरकारले नियोजित रूपमा आक्रण गरी प्रदर्शनलाई अराजक र हिंसात्मक बनाउने सम्भावना देखिकोले तत् सम्बन्धमा विशेष चनाखो रही अनुगमन गरिदिन मानवअधिकारवादी संघ संस्था र सञ्चार जगत समेतलाई सादर अनुरोध गर्दछौं ।’

संयुक्त जनआन्दोलन समितिले यस अघि पनि सरकारको दमन र दबाबका विरोधमा जनमत जुटाउँदै आएको छ । यसपटक पनि आन्दोलन शान्तिपूर्ण तर दृढ हुने बताएको छ । समितिले प्रदर्शनका क्रममा हुने कुनै पनि हिंसात्मक गतिविधिको निन्दा गर्दै सबै पक्षलाई संयम अपनाउन आग्रह गरेको छ ।