काठमाडौं, १९ वैशाख । नयाँ दिल्लीस्थत नेपाली राजदूतावासले भारतको ओडिसा राज्यस्थित कलिङ्गा इन्स्टिच्युट अफ इन्डस्ट्रियल ट्रेक्नोलोजी (केआइआइटी) मा अध्ययनरत वीरगञ्जकी प्रिसा साहको मृत्यु भएको घटनाको निश्पक्ष छानविन गर्न अनुरोध गरेको छ । छात्रा साह बिहीबार बेलुका आफ्नै कोठामा मृत भेटिएकी थिइन् ।

दूतावासले शुक्रबार एक प्रेस विज्ञप्ति जारी गर्दै भारतका लागि नेपाली राजदूत डा. शंकर शर्माले ओडिसाका मुख्य मन्त्री मोहनचरण माझी तथा उक्त प्रदेशका प्रमुख सचिवलाई घटनाको निश्पक्ष छानविन गर्न अनुरोध गरेको जनाएको छ ।

विज्ञप्तिमा भनिएको छ, राजदूतावासले केआइआइटीमा रहेका नेपाली विद्यार्थी लगायत भारतको केन्द्रिय सरकार एवं ओडिसाको मुख्यमन्त्री कार्यालय तथा अन्य सम्वन्धित भारतीय निकायहरुसँग निरन्तर सम्पर्क एवं समन्वय गरिरहेको छ ।’

दुतावासले उक्त घटनाको जानकारी हुनासाथ शैक्षिक संस्थाका प्रतिनिधिहरु, प्रहरी अधिकारीहरु, विदेश मन्त्रालयका अधिकृत लगायत अन्य सरोकारवालाहरुसँग तत्काल सम्पर्क तथा छलफल गरी घटनाको घटनाको स्वतन्त्र एवं निष्पक्ष तवरले अनुसन्धान गर्न तथा शैक्षिक संस्थामा अध्यनरत सम्पुर्ण नेपाली विद्यार्थीहरुको सुरक्षाको प्रत्याभूती हुन जोड दिएको बताएको छ ।

यसैगरी परराष्ट्र मन्त्रालयले पनि उक्त घटनाको छानबिनका निम्ति कूटनीतिक पहल सुरु गरिसकेको बताएको छ । परराष्ट्रमन्त्री डा. आरजु राणा देउवाले शुक्रबार सामाजिक सञ्जाल फेसबुकमार्फत भारतको आइआइटीमा अध्ययनरत नेपाली छात्रा प्रिसा साह आफ्नै होस्टेल कोठामा मृत भेटिएको घटनाबाट आफू मर्माहत भएको बताएकी छन् ।

उनले भनेकी छन्, ‘परराष्ट्र मन्त्रालयले घटनालगत्तै हिजो नै भारत सरकार, ओडिसा सरकारका उच्च अधिकारीहरु र दिल्लीस्थित नेपाली दूतावासमार्फत घटनाको सत्य, तथ्य छानबिन गर्न कूटनीतिक पहल थालेको छ ।’