काठमाडौं, २४ जेठ । राष्ट्रिय स्वतन्त्र पार्टीकी सांसद निशा डाँगीले राजनीतिक लाभका लागि असम्भव योजनाहरु घोषणा नगर्न सरकारलाई आग्रह गरेकी छन् । बिहीबार बसेको प्रतिनिधिसभाको विशेष समयमा बोल्दै उनले बजेट नहुँदा नहुँदै राजनीतिक लाभका लागि असम्भव योजना घोषणा नगर्न आग्रह गरेकी हुन् ।

सांसद डाँगीले राष्ट्रिय गौरवका आयोजना राजनीतिक लाभ हेरेर हचुवामा घोषणा हुने गरेको उल्लेख गर्दै त्यस्ता योजना वर्षौंसम्म बेबारिसे देखिएको बताइन् ।

प्रधानमन्त्री र मन्त्रीको चाहनामा मात्र राष्ट्रिय गौरवका आयोजना घोषणा गर्न नहुने उनको भनाई छ । उनले भनिन्,‘राष्ट्रिय गौरवका आयोजना प्रधानमन्त्री वा मन्त्रीका व्यक्तिगत इच्छामा वा चाहनामा नभई एउटा कंक्रिट मापदण्डका आधारमा छनोट गरियोस् ।’

यस्तै उनले संघ, प्रदेश र स्थानीय तहसम्म हाम्रो बजेटको ठूलो हिस्सा भ्यूटावर, स्वागत गेट र कंक्रिटका प्रतिमामा खर्च भइरहेको भन्दै विकासको यो भाष्य नै बदल्नुपर्ने बताइन् ।