सरकार स्वेच्छाचारी बाटोमा अघि बढ्यो : गगन थापा
अनलाइनसमय |
काठमाडौं, १५ कात्तिक । नेपाली कांग्रेसका सभापति गगनकुमार थापाले सरकार स्वेच्छाचारी र हुकुमी शैलीमा अघि बढ्न खोजेको आरोप लगाएका छन् । संविधान, प्रेस स्वतन्त्रता र अभिव्यक्ति स्वतन्त्रताका सवालमा सरकारको पछिल्लो व्यवहारले चिन्ता बढाएको उनको भनाइ छ ।
आइतबार पार्टी केन्द्रीय कार्यालय सानेपामा आयोजित पत्रकार सम्मेलनमा थापाले मिडिया हाउसमा प्रहरी प्रवेश गराएर पत्रकार पक्राउ गर्ने र चौतर्फी विरोध भएपछि रिहा गर्ने सरकारी कार्यशैलीप्रति आपत्ति जनाए ।
शासकले आफ्नो इच्छालाई नै कानुन ठान्न थाले देशमा समस्या उत्पन्न हुने उल्लेख गर्दै उनले सरकारको पछिल्लो प्रवृत्ति चिन्ताजनक रहेको बताए ।
‘हामीले जे बोल्यौँ, त्यही नै हुकुम हो र सरकारको इच्छा नै कानुन हो भन्ने सोच जब शासकमा आउँछ, तब देशमा समस्या सुरु हुन्छ,’ उनले भने ।
थापाले कानुनको पालना नागरिकले मात्रै नभई सरकारले पनि गर्नुपर्नेमा जोड दिए । सरकारका कामकारबाही संविधान र कानुनी व्यवस्थाअनुसार हुनुपर्ने उनको भनाइ थियो ।
यसैगरी, उनले विचौलियासम्बन्धी विषयमा गहिरो अनुसन्धान गर्नुपर्ने बताएका छन् । उक्त प्रकरणमा संलग्न सबैको पहिचान गरी दोषीलाई कानुनी दायरामा ल्याउनुपर्ने उनले बताए ।
