काठमाडौं, १३ असोज । राष्ट्रिय स्वतन्त्र पार्टी (रास्वपा) का सांसद जगदीश खरेलले ‘प्रधानमन्त्री दैवी प्रकोप उद्धार कोष’को नाम परिवर्तन गरी ‘प्रधानमन्त्री विपद् राहत कोष’ राख्नुपर्ने माग दोहोर्‍याएका छन् ।

प्रतिनिधिसभाको बैठकमा बोल्दै खरेलले आफूले यसअघि पनि यही विषय उठाएको स्मरण गराउँदै प्रधानमन्त्रीसँग जवाफ माग गरे । उनले विपद्लाई ‘दैवी प्रकोप’का रूपमा व्याख्या गर्न नहुने तर्क गरे ।

उनका अनुसार पछिल्लो विपद्मा २७ जनाको मृत्यु भइसकेको, चार जना अझै बेपत्ता रहेको र अर्बौं रुपैयाँ बराबरको भौतिक सम्पत्ति क्षति भएको छ । विपद् दैवले निम्त्याएको नभई प्राकृतिक वा मानवीय कारणबाट सिर्जना हुने भएकाले यसको व्यवस्थापन पनि सोहीअनुसार गर्नुपर्ने उनको भनाइ थियो ।

खरेलले विपद् व्यवस्थापन प्राधिकरणलाई सहसचिवस्तरका कर्मचारीको नेतृत्वमा सीमित संरचनाका रूपमा राख्न नहुने बताए । उनले प्राधिकरणलाई थप अधिकारसम्पन्न र प्रभावकारी बनाउनुपर्नेमा जोड दिए ।