काठमाडौं, २० जेठ । नेकपा माओवादी केन्द्रका सचिव देवेन्द्र पौडेलले आगामी आर्थिक वर्ष २०८१÷८२ को बजेटले मुलुकको अर्थ प्रणालीलाई सही बाटोमा ल्याउने बताएका छन् ।

आइतबार प्रतिनिधिसभामा बजेटमाथिको छलफलमा भाग लिँदै उनले पछिल्लो १५ वर्षमा मुलुकमा बढ्दै गएको निराशालाई लयमा ल्याउने गरी अर्थमन्त्रीले बजेट ल्याएको बताए ।

चालु आर्थिक वर्षमा २० खर्बसम्मको बजेट आउने अपेक्षा रहेको भन्दै पौडेलले अर्थमन्त्रीले स्रोतमा ध्यान दिएर १८ खर्ब ६० अर्बको बजेट ल्याएको बताए । बजेटले राखेको ६ प्रतिशतको आर्थिक वृद्धिदरको लक्ष्य तुलनात्मक रुपमा सन्तुलित र सम्भव भएको उनले बताए ।

बजेटमा केही कमी कमजोरी र कार्यान्वयनमा आशंका रहेकोले त्यसमा अर्थमन्त्रीले ध्यान दिनुपर्ने उनको धारणा थियो ।