काठमाडौं, २४ साउन । लगातारको अविरल वर्षापछिको बाढी र पहिरोका कारण देशका ६ विभिन्न राजमार्गका सडकखण्ड पूर्ण रूपमा अवरुद्ध भएका छन् ।

नेपाल प्रहरीले सार्वजनिक गरेको पछिल्लो अद्यावधिक विवरणअनुसार ६ सडक पूर्ण रूपमा अवरुद्ध भएका छन् भने बाढीको जोखिमलाई ध्यानमा राख्दै बीपी राजमार्ग र कान्ति लोकपथमा रातिको समयमा सवारी सञ्चालनमा रोक लगाइएको छ ।

इलामको राजदुवालीमा परेको अविरल वर्षाका कारण मेची राजमार्ग पूर्ण अवरुद्ध बनेको छ । त्यतै, सिन्धुपाल्चोकस्थित अरनिको राजमार्गका भोटेकोशी गाउँपालिकाअन्तर्गत चारकिलो, कोदारी र लिपिङ क्षेत्रमा पहिरो जाँदा आवतजावत पूर्ण रूपमा ठप्प छ ।

रसुवाको खाल्टेमा आएको बाढीले त्रिशुली–मैलुङ–स्याफ्रुबेसी सडक अवरुद्ध छ भने रुकुम पश्चिमको रिजेगार्ड खोलामा आएको बाढीका कारण भेरी करिडोर (जाजरकोट–डोल्पा सडकखण्ड) समेत पूर्ण रूपमा बन्द भएको प्रहरीले जनाएको छ ।

यसैगरी सम्भावित बाढी र पहिरोको जोखिमलाई मध्यनजर गर्दै वी.पी. राजमार्ग र कान्तिलोकपथमा रातिको समयमा सवारी सञ्चालनमा रोक लगाइएको छ ।

काठमाडौँको सितापाइला–धार्के सडक, भोजपुरको मध्य पहाडी लोकमार्ग, बागलुङको कालीगण्डकी करिडोर र पाल्पाको सिद्धार्थ राजमार्गमा पहिरो पन्छाएर एकतर्फी मात्र यातायात सुचारु गरिएको छ ।