काठमाडौं, २१ साउन । पूर्व–पश्चिम राजमार्गअन्तर्गत रौतहटको गुजरा नगरपालिका–३ स्थित धन्सार पुल नजिक पेट्रोल बोकेको ट्यांकर दुर्घटनामा परेपछि आगलागी हुँदा पूर्ण रूपमा जलेर नष्ट भएको छ ।

बाराको अमलेखगञ्जबाट १२ हजार लिटर पेट्रोल लिएर सर्लाहीतर्फ जाँदै गरेको मधेस प्रदेश ०३–००१ ख ७८११ नम्बरको ट्यांकर बिहीबार बिहान सडक छेउमा पल्टिएपछि आगलागी भएको प्रहरीले जनाएको हो ।

प्रारम्भिक अनुसन्धानका क्रममा चालकले जङ्गलबाट अचानक सडकमा आएको मृगलाई जोगाउने प्रयास गर्दा ट्यांकर अनियन्त्रित भई दुर्घटनामा परेको बयान दिएका छन् । दुर्घटनापछि पेट्रोलमा आगो सल्किँदा ट्यांकर पूर्ण रूपमा जलेर नष्ट भएको हो ।

इलाका प्रहरी कार्यालय चन्द्रनिगाहपुर प्रहरीका अनुसार दुर्घटनामा कुनै मानवीय क्षति भएको छैन ।