काठमाडौं, ८ असार । इरानसँगको युद्धका क्रममा क्षतिग्रस्त बनेको कतारको मुख्य प्राकृतिक ग्यास निर्यात टर्मिनल आइतवार राति पुनः सञ्चालन गर्ने प्रयास गर्दा भीषण विस्फोट भएको छ । उक्त विस्फोटपछि सल्किएको आगोका कारण कम्तीमा ५४ जना कामदार घाइते भएका छन् भने अन्य १८ जना अझै बेपत्ता रहेका छन् ।

कतारको प्रमुख औद्योगिक क्षेत्र ‘रास लफान’ मा भएको विस्फोटले विश्वव्यापी ऊर्जा बजारमा थप संकट पैदा गर्न सक्ने अनुमान गरिएको छ । कतार विश्वकै ठूला प्राकृतिक ग्यास उत्पादक राष्ट्रहरूमध्ये एक हो । यसअघि इरानले ‘स्ट्रेट अफ हर्मुज’ माथि आफ्नो नियन्त्रण कायम गरेपछि कतारले आफ्ना ग्राहकहरूलाई ग्यास ढुवानी गर्न नसक्दा उत्पादन पूर्ण रूपमा बन्द गरेको थियो ।

युद्धलाई स्थायी रूपमा अन्त्य गर्नका लागि भइरहेको वार्ताका बीच इरानले उक्त जलमार्गमा आफ्नो पकड केही खुकुलो बनाएको थियो । सोही अवसरको फाइदा उठाउँदै कतारले आफ्नो निर्यात टर्मिनल पुनः सुरु गर्ने कार्य अघि बढाएको थियो । कतारको सरकारी स्वामित्वमा रहेको कम्पनी ‘कतारइनर्जी’ का अनुसार आइतवार राति सोही मर्मत कार्यका क्रममा अचानक ‘बरजान ग्यास आपूर्ति केन्द्र’ मा विस्फोट भई आगलागी भएको हो ।

विस्फोटबाट भएको क्षतिको वास्तविक आकार अझै स्पष्ट हुन सकेको छैन । सुरुमा अधिकारीहरूले केही मानिस मात्र घाइते भएको बताएका थिए, तर केही घण्टापछि कतारको गृह मन्त्रालयले ठूलो संख्यामा हताहत भएको आधिकारिक विवरण सार्वजनिक गरेको हो ।

बरजान प्लान्टको क्षमता दैनिक करिब १.४ अर्ब स्ट्यान्डर्ड क्युबिक फिट ग्यास उत्पादन गर्ने रहेको छ । कतारले यस ग्यासलाई मुख्यतः स्थानीय विद्युत उत्पादन र मरुभूमिले घेरिएको अरेबियन प्रायद्वीपमा रहेका आफ्ना महत्त्वपूर्ण खानेपानी शुद्धीकरण प्लान्टहरू सञ्चालन गर्न प्रयोग गर्दै आएको थियो ।

यस ग्यास प्लान्टको अधिकांश हिस्सा कतार सरकारको स्वामित्वमा छ भने केही सानो हिस्सा अमेरिकी बहुराष्ट्रिय तेल कम्पनी ‘एक्सनमोबिल’ को रहेको छ ।

यसअघि गत मार्च महिनामा पनि रास लफान क्षेत्रमा इरानी मिसाइल प्रहार भएको थियो, जसका कारण त्यहाँ ‘व्यापक’ क्षति पुगेको अधिकारीहरूले बताएका थिए । इरानी आक्रमणका कारण कतारले उक्त क्षेत्रमा ग्यास उत्पादन पहिले नै स्थगन गरिसकेको थियो । एजेन्सी