काठमाडौं, २२ वैशाख । मध्य चीनको हुनान प्रान्तमा रहेको एक आतसबाजी (पटाखा) उत्पादन कारखानामा भएको विस्फोटमा २१ जनाको मृत्यु भएको छ भने ६१ जना घाइते भएका छन् । सोमबार भएको उक्त घटनामा अझै जोखिम कायम रहेकाले उद्धार तथा सुरक्षा कार्य निरन्तर जारी छ ।

चिनियाँ सरकारी समाचार संस्था सिन्ह्वाका अनुसार विस्फोट चाङ्सा सहरअन्तर्गतको औद्योगिक क्षेत्रमा अवस्थित कारखानामा भएको हो । स्थानीय सञ्चारमाध्यमका अनुसार उक्त उद्योग लियुयाङ क्षेत्रको प्रमुख आतसबाजी उत्पादन केन्द्रमा पर्ने हुआशेङ आतसबाजी निर्माण तथा प्रदर्शन कम्पनीद्वारा सञ्चालन हुँदै आएको थियो ।

राज्य टेलिभिजनले सार्वजनिक गरेको हवाई दृश्यमा विस्फोटपछि कारखानाका संरचनाहरू ध्वस्त भएको र केही स्थानमा अझै सेतो धुवाँ उठिरहेको देखिएको छ, जसले घटनास्थल पूर्ण रूपमा सुरक्षित नभएको संकेत गर्छ ।

घटनापछि करिब ५०० उद्धारकर्मी परिचालन गरिएको छ । विस्फोटस्थल नजिकै रहेका दुई उच्च जोखिमयुक्त बारुद भण्डारका कारण थप विस्फोटको खतरा रहेकाले आसपासका बासिन्दालाई सुरक्षित स्थानमा सारिएको छ ।

हालसम्म विस्फोटको कारण पत्ता लागेको छैन । सम्बन्धित निकायहरूले विस्तृत अनुसन्धान अघि बढाएका छन् भने कम्पनीका जिम्मेवार व्यक्तिहरूमध्ये एकलाई नियन्त्रणमा लिइएको बताइएको छ ।

यस घटनापछि चिनियाँ राष्ट्रपति सी जिनपिङले बेपत्ता व्यक्तिको खोजी र घाइतेहरूको उद्धारलाई उच्च प्राथमिकतामा राख्न निर्देशन दिएका छन् ।