काठमाडौं, २० वैशाख । केही दिनयतादेखिको वर्षासँगै आएको पहिराका कारण ३ मुख्य राजमार्ग तथा सडकखण्ड पूर्ण रुपमा अवरुद्ध भएका छन् । २ वटा सडक एकतर्फी रुपमा सञ्चालनमा आएको छ ।

नेपाल प्रहरीका अनुसार आज बिहानको पहिराका कारण ललितपुर बागमती गाउँपालिका–३ पाङ्दुरस्थित कान्तिलोकपथ पूर्णरुपमा अवरुद्ध छ ।

त्यस्तै, सिन्धुपाल्चोक भोटेकाशी गाउँपालिका केदारी स्थित ईकु पहिरो अरनिको राजमार्ग र लमजुङ मध्यनेपाल नगरपालिका–१० बिमिरे भञ्ज्याङस्थित मध्यपहाडी लोकमार्ग पनि पूर्ण रुपमा अवरोध भएको प्रहरीले जनाएको छ ।

यही वैशाख १२ गतेको बाढीका कारण अवरुद्ध भएका भोजपुर नगरपालिका–५ बोखिमको मध्यपहाडी लोकमार्ग तथा वैशाख १६ गतेको पहिराले म्याग्दीको अन्नपूर्ण गाउँपालिका–३ जलथलेस्थित बेनी–जोमसोम सडकखण्ड भने एकतर्फी रुपमा सञ्चालनमा आएको प्रहरीले जनाएको छ ।