काठमाडौं, १३ वैशाख । कोलम्बियाको काउका विभागको काजिबियो नगरपालिकामा शनिबार भएको बम विस्फोटमा कम्तीमा सात जनाको मृत्यु भएको छ भने २० भन्दा बढी घाइते भएका छन् ।

अन्तरराष्ट्रिय समाचार संस्था सिन्ह्वाका अनुसार काली–पोपायान जोड्ने पान–अमेरिकी राजमार्गको एल टुनेल क्षेत्रमा गुडिरहेको बसलाई लक्षित गरी बम प्रहार गरिएको हो । विस्फोटका कारण बसमा ठूलो क्षति पुगेको छ भने राजमार्ग पनि प्रभावित भएको छ ।

स्थानीय चालकहरूका अनुसार हतियारधारी समूहले ट्रक र बस नियन्त्रणमा लिएर सडक अवरुद्ध बनाएका थिए । काउका विभागका गभर्नर अक्टाभियो गुज्मानले घटनाको निन्दा गर्दै नागरिक सुरक्षाका लागि सरकारसँग कदम चाल्न माग गरेका छन् ।