काठमाडौं, ५ फागुन । सर्लाहीमा कार्यरत प्राविधिक कर्मचारीमाथि भएको गोली प्रहारको घटनाप्रति नेपाल इन्जिनियर्स एशोसिएसनले गम्भीर ध्यानाकर्षण गराएको छ । एशोसिएसनले आज गृह मन्त्रालय पुगेर गृहमन्त्रीलाई ज्ञापनपत्र बुझाउँदै दोषीलाई छिट्टै पक्राउ गरी कडा कारबाही गर्नुपर्ने र कार्यस्थलमा इन्जिनियरहरूको सुरक्षा सुनिश्चित गर्नुपर्ने माग गरेको हो ।

सार्वजनिक विकास निर्माणमा खटिने प्राविधिकहरू असुरक्षित वातावरणमा काम गर्न बाध्य रहेको एशोसिएसनले जनाएको छ । तत्काल प्रभावकारी कदम नचालिए देशभरका इन्जिनियरहरू आन्दोलनमा उत्रन बाध्य हुने समेत चेतावनी दिएको छ ।

एशोसिएसनले सर्लाही घटनाको निष्पक्ष छानबिन गरी सत्यतथ्य सार्वजनिक गर्न र देशभरका इन्जिनियरहरूलाई सुरक्षित वातावरणमा काम गर्न मिल्ने सुनिश्चित गर्न सरकारसँग जोडदार माग गरेको छ ।