काठमाडौं, २३ पुस । अब नेपालीले अमेरिका जान साढे २१ लाखसम्म धरौटी राख्नुपर्ने भएको छ । अमेरिकाको विदेश मन्त्रालयले अमेरिका प्रवेश गर्नुअघि धरौटी तिर्नुपर्ने देशहरूको सूचीमा नेपाललाई पनि राखेको छ । आगामी जनवरी २१ देखि बी–१/बी–२ भिसामा अमेरिका जाने नेपालीहरूले भिसा निवेदनसँगै ५ देखि १५ हजार डलर (७ लाख २२ हजारदेखि २१ लाख ६६ हजार १९३ नेपाली रुपैयाँ) सम्म शुल्क तिर्नुपर्ने भएको हो ।

विदेशी नागरिकको भिसा अन्तर्वार्ताका क्रममा कन्सुलर अधिकारीले धरौटीको रकम तय गर्नेछन् । धरौटी राख्नका लागि आवेदकले डिपार्टमेन्ट अफ होमल्यान्ड सेक्युरिटी ¬(डिएचएस)को फारम आई–३५२ भर्नुपर्नेछ र त्यसपछि ट्राभल डट् स्टेट डट् गोभमा अनलाइनमार्फत भुक्तानी गर्नुपर्नेछ । यस्तो रकम कन्सुलरको निर्देशनबिना भुक्तानी गरेमा अमेरिकी सरकारले जिम्मेवारी नलिने र रकम फिर्ता नगरिने वेवसाइटमा उल्लेख छ ।

भिसाको अवधिभन्दा बढी अमेरिकामा बस्ने प्रवृत्तिलाई निरुत्साहित गर्ने उपायको रूपमा यसलाई ल्याइएको हो । आफ्नो भिसाको शर्त उल्लंघन नगर्ने बी–१/बी–२ यात्रीहरूले अमेरिकाबाट आफ्नो देश फर्केपछि सो रकम फिर्ता पाउनेछन् ।

धरौटी तिर्नेहरूका लागि अतिरिक्त यात्रा प्रतिबन्धहरू पनि लागू हुनेछन् । भिसा प्राप्त गरिसकेपछि यात्रीहरूले बोस्टन लोगान, जोन एफ. केनेडी र वाशिंगटन डल्स अन्तर्राष्ट्रिय विमानस्थलबाट मात्र अमेरिका प्रवेश गर्न पाउनेछन् । अन्य स्थानबाट आगमन भएमा प्रवेशमा रोक लगाइने वा प्रस्थानको रेकर्ड गलत तरिकाले राखिने बताइएको छ ।

डिपार्टमेन्ट अफ होमल्यान्ड सेक्युरिटीले भिसावाहकलाई अमेरिकामा बस्न अनुमति दिइएको अन्तिम मिति वा सोभन्दा अगाडि नै अमेरिकाबाट प्रस्थान गरेको रेकर्ड राखेमा, वा भिसावाहकले भिसाको म्याद समाप्त हुनुभन्दा अगाडि अमेरिकाको यात्रा नगरेमा, वा भिसावाहकले अमेरिकाको प्रवेश विन्दुमा प्रवेशका लागि आवेदन दिँदा प्रवेश अस्वीकार गरिएमा धरौटी स्वचालित रूपमा रद्द हुने र रकम फिर्ता हुने व्यवस्था छ ।

तर, नियम उल्लंघन भएमा डिएचएसले उक्त केस यूएस सिटिजनशिप एन्ड इमिग्रेसन सर्भिसेजमा पठाउनेछ । तोकिएको म्यादपछि अमेरिका छोडेमा, म्यादपछिको समयसम्म अमेरिका नछाडेमा वा गैरआप्रवासी स्थिति परिवर्तन निवेदन दिएमा उल्लंघन भएको मानिन्छ ।