काठमाडौं । एसवाई प्यानल नेपाल लिमिटेडले जारी गरेको साधारण शेयर (आईपीओ)मा आवेदन दिने आज (कात्तिक २३ गते) अन्तिम मौका रहेको छ । कम्पनीले कात्तिक १९ गतेदेखि सर्वसाधारणका लागि आईपीओ निष्काशन खुला गरेको हो ।

यसअघि कम्पनीले उद्योग प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीका लागि आईपीओ जारी गरी बाँडफाँट गरिसकेको छ । त्यसपछि सर्वसाधारणका लागि दोस्रो चरणमा शेयर निष्काशन गरिएको हो ।

कम्पनीको जारी पूँजी १ अर्ब ३० करोड ८९ लाख ३७ हजार १०० रुपैयाँ रहेको छ । सो मध्ये ४० प्रतिशत अर्थात ५२ करोड ३२ लाख ५४ हजार ८०० रुपैयाँ बराबरको ५२ लाख ३२ हजार ५४८ कित्ता शेयर बिक्रीका लागि स्वीकृत गरिएको थियो ।

दोस्रो चरणमा सर्वसाधारण लगानीकर्ताका लागि प्रतिशेयर अंकित मूल्य १०० रुपैयाँका दरले ४० लाख ७६ हजार १५६ कित्ता शेयर जारी गरिएको छ । लगानीकर्ताले न्यूनतम १० कित्ता र अधिकतम ५० हजार कित्तासम्मका लागि आवेदन दिन सक्नेछन् ।

आईपीओको रेटिङ्गका क्रममा इक्रा नेपालले कम्पनीलाई ‘इक्राएनपी इशुअर रेटिङ डबल बी प्रदान गरेको छ, जसले कम्पनीको दायित्व वहन क्षमतामा मध्यम स्तरको जोखिम रहेको संकेत गर्छ ।