काठमाडौं । भारतले नेपालबाट थप ८० मेगावाट विद्युत् आयात गर्ने भएको छ । नयाँ स्वीकृतिअनुसार मेवा खोला जलविद्युत् आयोजना (४८.५ मेगावाट) र करुवा सेती जलविद्युत् आयोजना (३१.०४ मेगावाट) को उत्पादन भारत निर्यात गर्न लागिएको हो ।

यसअघि भारतले २०० मेगावाट विद्युत् आयातका लागि अनुमति दिएको थियो । हाल स्वीकृत भएको परिमाणसहित नेपालले मध्यम अवधिसम्म विद्युत् निर्यात गर्न पाउने प्राधिकरणले जनाएको छ । सो अवधिअनुसार आगामी ३१ अक्टोबर २०२६ सम्म नेपालले भारतलाई बिजुली पठाउन सक्नेछ ।

नेपाल वर्षायाममा अतिरिक्त विद्युत् विदेश पठाउने गरेको छ भने सुख्खा मौसममा भने भारतबाट आयात गर्ने परिपाटी छ । हाल नेपालले भारतसँगै बंगलादेशलाई पनि ४० मेगावाट विद्युत् निर्यात गरिरहेको छ ।