काठमाडौं, २१ साउन । स्वस्तिक लघुवित्त वित्तीय संस्था लिमिटेडले सर्वसाधारण लगानीकर्ताहरूका लागि साउन ३० गतेदेखि प्राथमिक शेयर (आईपीओ) निष्काशन गर्न लागेको छ । यसअघि वैदेशिक रोजगारीमा रहेका नेपालीहरूका लागि जारी गरिएको आईपीओको बाँडफाँट सम्पन्न भएसँगै दोस्रो चरण अन्तर्गत आम लगानीकर्ताका लागि शेयर बिक्री खुला गर्न लागिएको हो ।

लघुवित्तले आफ्नो कुल जारी पूँजीको ४० प्रतिशत हिस्सा सार्वजनिक गर्ने योजनाअन्तर्गत कुल २ लाख ३१ हजार कित्ता शेयर निष्काशनको स्वीकृति पाएको थियो । पहिलो चरणमा कर्मचारीहरूलाई १ हजार १५५ कित्ता, सामूहिक लगानी कोषलाई ११ हजार ५५० कित्ता र विदेशमा रहेका नेपालीलाई २३ हजार १०० कित्ता शेयर छुट्याइएको थियो ।

अब सार्वजनिक निष्काशनको दोस्रो चरणमा सर्वसाधारणका लागि १ लाख ९५ हजार १९५ कित्ता शेयर खुला गरिनेछ, जसको कुल मूल्य १ करोड ९५ लाख १९ हजार ५ सय रुपैयाँ हुने बताइएको छ । यस शेयरको अंकित मूल्य प्रतिकित्ता १०० रुपैयाँ निर्धारण गरिएको छ ।

आईपीओमा आवेदन दिनको लागि न्यूनतम १० कित्ता र अधिकतम ५ हजार कित्तासम्म माग गर्न सकिनेछ । निष्काशन अवधि भदौ ३ गतेसम्म रहनेछ, तर आवश्यक आवेदन नपरेको खण्डमा भदौ १३ गतेसम्म म्याद लम्बिन सक्नेछ ।