काठमाडौं, २५ असार । रसुवाको भोटेकोशी नदीमा आएको बाढी सामान्य वर्षाका कारण नभई हिमताल विस्फोटका कारण आएको हुनसक्ने प्रारम्भिक निष्कर्ष सार्वजनिक भएको छ । अन्तर्राष्ट्रिय एकीकृत पर्वतीय विकास केन्द्र (ईसीमोड)ले विज्ञप्ति जारी गर्दै हिमताल फुटेको आशंका व्यक्त गरेको हो ।

केन्द्रका अनुसार बाढी वर्षाभन्दा भिन्न कारण रहेको प्रारम्भिक अनुसन्धानले देखाएको छ । यसअघि नेपाल सरकारको जल तथा मौसम विज्ञान विभागले पनि रसुवा क्षेत्रमा अत्यधिक वर्षा नभएको र बाढीको स्रोत सामान्य वर्षा नभएको जनाएको थियो । विभागले ठोस निष्कर्षमा पुग्न थप अनुसन्धान आवश्यक रहेको र भूगर्भविद्, हिमनदी तथा जलवायु विज्ञहरूको टोली परिचालन गरिने जानकारी दिएको छ ।

ईसीमोडका वरिष्ठ जलविज्ञान अनुसन्धानकर्ता प्रदीपमान डङ्गोलका अनुसार बाढी हिमताल विस्फोटबाट आएको हुनसक्ने सम्भावना रहेको छ । उनले सन् २०२१ मा गरिएको अध्ययन उल्लेख गर्दै त्रिशूली नदीको तिब्बत क्षेत्रमा अवस्थित एक हिमताललाई उच्च जोखिममा राखिएको जानकारी गराए ।