काठमाडौं, २८ चैत । हङकङमा जारी चारदेशीय टी–२०आई क्रिकेट प्रतियोगितामा नेपालले नेपालले लगातार दोस्रो जित हात पारेको छ । बिहीबार भएको खेलमा नेपालले कुवेतलाई ६ विकेटले हराउँदै कीर्तिमानी जित निकालेको हो ।

कुवेतले दिएको १८६ रनको लक्ष्य पछ्याएको नेपालले ७ बल बाँकी हुँदा ४ विकेटको क्षतिमा पूरा गरेको हो ।

नेपालका लागि ओपनर कुशल भुर्तेलले सर्वाधिक ८१ रन बनाए । त्यस्तै आसिफ शेखले ५३ रन, दिपेन्द्रसिंह ऐरीले १२ बलमा ३१ रन जोडे ।

कुवेतका लागि यासिन पटेलले ४ ओभरमा १७ रन दिएर २ विकेट लिए । मोहम्मद सफीक र मोहम्मद असलमले १–१ विकेट लिए ।

खेलमा टस हारेर पहिले ब्याटिङको निम्तो पाएको कुवेतले नेपाललाई १८६ रनको प्रतिस्पर्धात्मक लक्ष्य प्रस्तुत गरेको थियो । कुवेतले २० ओभरमा ७ विकेट गुमाएर १८५ रन बनायो ।

कुवेतका लागि क्लिन्टो एन्टोले सर्वाधिक ४१ रन बनाए । मिट भावसरले ३५ तथा बिलाल ताहिरले ३२ रन बनाए । रविजा सन्दरुवानले २६ रन बनाए ।

नेपाल लगातार दोस्रो जितसँगै प्रतियोगिताको फाइनलमा पुग्ने सम्भावना बलियो भएको छ । यसअघि नेपालले बुधबार कतारलाई ८ विकेटले हराएको थियो ।