काठमाडौं, १५ चैत । अस्ट्रेलियामा आगामी मे ३ मा संघीय निर्वाचन हुने भएको छ ।

प्रधानमन्त्री एन्थोनी अल्बनीजले शुक्रबार मे ३ मा देशमा आम चुनाव घोषणा गरेका हुन्, जसमा लेबर पार्टी र विपक्षी गठबन्धनबीच कडा प्रतिस्पर्धा देखिन्छ ।

अहिले एन्थोनी अल्बनीजको लेबर पार्टीसँग झिनो बहुमत मात्र छ । यस्तो अवस्थामा दुवै ठूला राजनीतिक दलहरूलाई निर्दलीय सांसद वा अन्य साना दलहरूमाथि निर्भर रहनुपर्ने सम्भावना छ । यो स्थितिले लेबर पार्टीका लागि सन् १९३१ यताकै पहिलो एक–कार्यकालीय सरकार हुने जोखिम निम्त्याउने संकेत गरेको छ ।

सन् २०२२ मा भएको चुनावमा साना दल र स्वतन्त्र उम्मेदवारहरूले रेकर्ड स्तरमा मत हासिल गरेका थिए । चुनावी अभियानमा जीवनयापनको लागतसँग सम्बन्धित मुद्दाहरू हावी हुने सम्भावना छ ।

अल्बनीजले प्रेस कन्फ्रेन्समा जीवनयापनको लागतलाई कम गर्ने आफ्नो प्रतिबद्धता दोहो¥याए । उनले रोजगारी, शिक्षा, स्वास्थ्य र आर्थिक स्थायित्वलाई निरन्तरता दिने प्रतिबद्धता व्यक्त गरेका छन् । उनले यसअघि नै बढी निःशुल्क स्वास्थ्य सेवा प्रदान गर्ने, विद्यार्थी ऋण कम गर्ने र साना कर कटौती लागू गर्ने योजना घोषणा गरिसकेका थिए।

त्यसैगरी विपक्षी नेता पिटर डटनले ग्यास आपूर्ति बढाउने, पेट्रोल र बिजुलीको मूल्य घटाउने तथा स्थायी आप्रवासनलाई २५% ले कटौती गर्ने योजना प्रस्तुत गरेका छन् ।