अनुमति नलिई भारतीय विमानस्थल हुँदै श्रमिक विदेश पठाउने ३९ म्यानपावरलाई विभागले गर्यो कारबाही
अनलाइनसमय |
काठमाडौं, २० साउन । वैदेशिक रोजगार विभागले नेपाली श्रमिकलाई भारतका विमानस्थलहुँदै वैदेशिक रोजगारीमा पठाउने ३९ म्यानपावरलाई कारबाही गरेको छ ।
विभागको अनुमति नलिई भारतका विमानस्थलहुँदै पटक–पटक श्रमिक पठाएको पाइएपछि ३९ म्यानपावर कम्पनीलाई ५० हजारका दरले जरिबाना गरिएको विभागले जनाएको छ ।
यस्तै, विभागले पहिलो र दोस्रो पटकसम्म उडान विवरण माग गर्दा पनि निर्देशन पालना नगरी विवरण उपलब्ध नगराउने १२४ वटा इजाजतवाला संस्थाहरूलाई स्पष्टीकरण पेस गर्न निर्देशन दिएको छ ।
वैदेशिक रोजगार ऐन, २०६४ बमोजिम वैदेशिक रोजगारीमा जाने श्रमिकहरूले स्वदेशी विमानस्थल नै प्रयोग गर्नुपर्ने कानुनी व्यवस्था रहेको छ ।
विभागको पूर्वअनुमतिबिना विदेशी विमानस्थल प्रयोग गरी श्रमिक पठाउने र विभागको निर्देशन अटेर गर्ने संस्थाहरूमाथि कडाइका साथ कारबाही अघि बढाइने विभागले जनाएको छ ।
