काठमाडौं, ३१ भदौ । राष्ट्रिय स्वतन्त्र पार्टी (रास्वपा)का सांसद रमेश प्रसाईंले आफ्नै सरकारको पालामा महँगीले अग्रगामी छलाङ मारेको टिप्पणी गरेका छन् ।

बुधबार बसेको प्रतिनिधिसभा बैठकमा बोल्दै उनले विपत्‌ले देश छटपटाइरहेको बेलामा बजार उद्दण्ड भएको बताए ।

‘एकातिर देश विपत्‌ले छटपटाइरहेको बेला अर्कोतिर बजार उद्दण्ड भयो र मेरै सरकारको पालामा महँगीले अग्रगामी छलाङ लगायो । प्याज, चिनी, चामल, तेल हरेक चिजको भाउ बढ्यो । चिल्ला गाडी चढ्नेहरूलाई फरक परेन, तर हामीजस्ताको ढाड सेकियो त,’ सांसद प्रसाईंले भने ।

साथै उनले नवनिर्वाचित उद्योगमन्त्रीलाई शुभकामना दिँदै कालो बजारी नियन्त्रण गर्ने गरी काम गर्न आग्रह पनि गरे ।