काठमाडौं, ३१ भदौ । बाढीपहिरोका कारण अवरुद्ध पृथ्वीराजमार्गअन्तर्गत नागढुंगा–मुग्लिन सडकखण्डको कृष्णभीरमा नयाँ ट्रयाक खोल्ने काम पूरा भएको छ । ट्रयाक निर्माण सकिएसँगै भोलिदेखि उक्त सडकखण्डमा पूर्णरूपमा सवारीसाधन सञ्चालन गर्ने तयारी गरिएको सडक डिभिजन कार्यालय भरतपुरले जनाएको हो ।

आइतबार भित्तातर्फको कटिङ र सडक सम्याउने काम पूरा भएपछि केही सवारीसाधनलाई परीक्षणका रूपमा सञ्चालन गरिएको थियो । परीक्षण सफल भएपछि नियमित यातायात सञ्चालनका लागि आवश्यक कामलाई तीव्रता दिइएको हो ।

करिब ३०० मिटर लामो नयाँ ट्रयाकमा सात मिटर चौडाइको सडक निर्माण गरिएको छ । सडकसँगै नालीसमेत निर्माण गरी करिब साढे सात मिटर चौडाइको संरचना तयार गरिएको छ ।

ट्रयाक खोल्ने कामको पहिलो चरणमा ९ देखि १० दिनसम्म ११–१२ वटा उपकरण परिचालन गरिएको थियो । निर्माणमा करिब ४० देखि ५० जना दक्ष तथा अदक्ष मजदुर खटिएका थिए ।