हिउँदे अधिवेशनका लागि क्यालेन्डर तयार, संसद् सुरु भएकै दिन अध्यादेश पेस गरिने
अनलाइनसमय |
काठमाडौं, १४ माघ । संघीय संसद् सचिवालयले आगामी १८ गतेबाट सुरु हुने हिउँदे अधिवेशनका लागि क्यालेन्डर तयार पारेको छ । सत्तारुढ दल नेकपा एमालेका मुख्य सचेतक महेश बर्तौलाका अनुसार १८ गतेदेखि ३० गतेसम्म बस्ने बैठकका लागि संसद्को क्यालेन्डर तयार पारिएको छ ।
क्यालेन्डर निर्माणको तयारीका लागि सभामुख देवराज घिमिरेले आइतबार पाँच प्रमुख दलका प्रमुख सचेतक र सचेतकसँग छलफल गरेका थिए ।
कार्यतालिका अनुसार संसद्को पहिलो दिन प्रधानमन्त्री लगायतका शीर्ष नेताहरूले सम्बोधन गर्ने छन् । सोही दिन सरकारले ल्याएका विभिन्न अध्यादेश संसद्मा पेस हुने छ ।
त्यसपछि अर्को बैठक २२ गते बस्नेछ । सो दिन पहिलो दिन पेस भएका अध्यादेशहरू निर्णयार्थ प्रस्तुत गर्ने कार्यसूची छ ।
माघ २३ र २४ गते पनि संसद् बैठक तय भएको छ । २५, २६ र २७ गते भने विभिन्न समितिको बैठक राखिएको छ । त्यसपछि माघ २८, २९ र ३० संसद् बैठक बस्नेछ ।
