काठमाडौं, ३० भदौ । देशका विभिन्न जिल्लामा आज पनि आकस्मिक बाढीको जोखिम कायमै रहेको बाढी पूर्वानुमान महाशाखाले जनाएको छ । वर्षा जारी रहेकाले साना तथा ठूला नदीमा पानीको बहाव बढ्न सक्ने महाशाखाको पूर्वानुमान छ ।

महाशाखाका अनुसार ताप्लेजुङ, तेह्रथुम, संखुवासभा, सोलुखुम्बु, सिन्धुपाल्चोक, काभ्रेपलाञ्चोक, काठमाडौं, भक्तपुर, ललितपुर, गोरखा, तनहुँ, लमजुङ, कास्की, पर्वत, बागलुङ, म्याग्दी, बझाङ र बाजुरा तथा आसपासका क्षेत्रमा बहने स–साना नदीमा बहाव उल्लेख्य बढ्ने सम्भावना छ ।

यी जिल्लामा आकस्मिक बाढीको मध्यम जोखिम रहेको महाशाखाले जनाएको छ । यससँगै देशका केही ठूला नदीमा समेत पानीको बहाव बढ्ने अनुमान गरिएको छ ।

वर्षा र नदीको जलस्तर बढ्न सक्ने भएकाले नदी तथा खोलानाला आसपासका बासिन्दालाई सतर्क रहन आग्रह गरिएको छ ।