काठमाडौं, १७ फागुन । सुपर खुदी हाइड्रोपावरको प्राथमिक सार्वजनिक निष्काशन (आईपीओ) आज बाँडफाँट गरिएको छ । कम्पनीको धितोपत्र निष्काशन तथा बिक्री प्रबन्धक ग्लोबल आइएमई क्यापिटल को कार्यालयमा बिहान साढे ८ बजे गोलाप्रथामार्फत शेयर वितरण गरिएको हो ।

कम्पनीले फागुन ५ गतेदेखि ११ गतेसम्म सर्वसाधारणका लागि प्रतिकित्ता १०० रुपैयाँ अंकित दरमा १२ लाख ८६ हजार ५०० कित्ता साधारण शेयर बिक्री खुला गरेको थियो । सो अवधिमा २६ लाख २० हजार ३४१ जनाबाट २ करोड ८१ लाख ६४ हजार ८५० कित्ताका लागि आवेदन परेको क्यापिटलले जनाएको छ ।

प्राप्त आवेदनमध्ये २५ लाख ८० हजार ४७० वटा स्वीकृत भएका छन् भने ३९ हजार ८७१ आवेदन विभिन्न कारणले रद्द गरिएको छ । मागभन्दा अत्यधिक आवेदन परेकाले गोलाप्रथा प्रणालीमार्फत शेयर बाँडफाँट गरिएको हो ।

बाँडफाँट परिणामअनुसार १ लाख २८ हजार ६५० आवेदकले न्यूनतम १० कित्ताका दरले शेयर हात पारेका छन् ।