काठमाडौं, ३१ चैत । वि.सं २०८१ कोे अन्तिम कारोबार दिन आज (आइतबार) नेपाल स्टक एक्सचेन्ज (नेप्से) परिसूचक ८ दशमलव ८४ अङ्कले घटेको छ । यो ह्राससँगै परिसुचक २ हजार ६६१ दशमलव ८६ को विन्दुमा कायम भएको छ ।

आज कारोबार रकममा भने केही सुधार आएको छ । अघिल्लो कारोबार दिन बिहीबार ५ अर्ब ६३ करोडको कारोबार भएकोमा आज ६ अर्ब २८ करोड २ लाख रुपैयाँ बराबरको कारोबार भएको छ । यस दिन १ करोड ३१ लाख ८९ हजार ३२८ कित्ता शेयर ५४ हजार ३६१ पटक किनबेच भएको छ ।

यस दिन ३२२ धितोपत्र कारोबार आए, जसमध्ये १५७ वटा धितोपत्रको शेयर मूल्य घटेको छ भने ८८ वटा धितोपत्रको शेयर मुल्य बढेको छ ।

आइतबार कारोबार भएका १३ समूहको उपसमूहमध्ये ९ वटा समूहको उपसूचक घट्दा ४ समूहको उपसूचक बढको छ । यस दिन लगानी समूहको सर्वाधिक १.६८, म्युचुअल फन्डको ०.२६, होटल एन्ड टुरिजमको ०.१४ र निर्जीवन बीमाको ०.०८ प्रतिशतले बढेको छ । आज सबैभन्दा बढी व्यापार समूहको उपसूचक १.४० प्रतिशतले घटेको छ ।

आइतबार गुडवील फाइनान्स लिमिटेडको डिबेन्चर २०८३ र नेपाल माइक्रो इन्स्योरेन्स कम्पनीको शेयर मूल्यमा सकारात्मक सर्किट लागेको छ । त्यस्तै क्रेस्ट माइक्रोलाइफ इन्स्योरेन्सको ९.९८, त्रिशुली जलविद्युतको ६.३० र एनआइबीएल स्टेबल फन्डको ५.२२ प्रतिशतले शेयर मूल्य बढेको छ ।

आज वीन नेपाल लघुवित्तको शेयर मूल्यमा नकारात्मक सर्किट लागेको छ । त्यस्तै बलेफी हाइड्रोपावरको ९.९८, सिन्धु विकास बैंकको ९.०८, गार्डिएन माइक्रो लाइफको ४.७१ र ङादी हाइड्रोपावको ४.६५ प्रतिशतले शेयर मूल्य घटेको छ ।