काठमाडौं, २१ चैत । नेपालको वैदेशिक व्यापार घाटा निरन्तर बढ्दो छ । आयातको तुलनामा निर्यात क्षमता कम्जोर हुँदा नेपालको व्यापार घाटा बढ्दै गएको हो ।

भन्सार विभागको तथ्याङ्क अनुसार चालू आर्थिक वर्ष (आव)को ८ महिनामा नेपालले १६० ओटा देशसँग वैदेशिक व्यापार गरेको छ । जसमध्ये १२६ देशसँग व्यापार घाटामा रहदाँ ३४ देशसँग मात्रै व्यापार बचतमा छ । व्यापार घाटा भएका यस्ता मुलुकहरू पनि छन्, जोसँग नेपाललाट निर्यात नै भएको छैन । त्यस्ता मुलुकहरूमध्ये तुर्कमेनिस्तान पनि एक हो ।

वैदेशिक व्यापारमा धेरै नाम नसुनिएको तुर्कमेनिस्तानसँग नेपालले हालसम्म एक रुपैयाँको पनि निकासी गर्न गरेको छैन । यद्यपि चालू आवको ८ महिनामै यो मुलुकबाट ८२ करोड ३८ लाख रुपैयाँको वस्तु आयात गरिसकेको विभागको तथ्याङ्क छ ।

सो अवधिमा तुर्कमेनिस्तानबाट गत फागुनसम्ममा सबैभन्दा धेरै भित्रिने वस्तुमा पोटासियम क्लोराइड रहेको छ । यो ६७ करोड ९३ लाख रुपैयाँ बराबरको १ करोड २६ लाख ७५ हजार किलोग्राम (केजी) आयात भएको छ । त्यसैगरी १४ करोड ४४ लाख रुपैयाँ बराबरको २६ लाख केजी रासायनिक मल, पोटासिक भित्रिएको छ ।