81 Views

काठमाडौं, २८ भदौ । बागलुङमा भएको गाडी दुर्घटनामा रुकुमपूर्वको पुथाउत्तरगंगा गाउँपालिका उपाध्यक्ष भुपेन्द्रा बुढासहित तीन जनाको मृत्यु भएको छ ।

शुक्रबार बिहान पौने ९ बजे गलकोट नगरपालिका वडा नम्बर २ भुङखानीस्थित मध्यपहाडी लोकमार्गमा रा १ झ २०० नम्बरको सरकारी गाडी दुर्घटनामा परेको थियो । उक्त गाडीमा पुथाउत्तरगंगा गाउँपालिका उपाध्यक्ष भुपेन्द्रा बुढा र केही कर्मचारीहरु सवार थिए ।

जिल्ला प्रहरी कार्यालय बागलुङका अनुसार दुर्घटनामा परेको गाडी पुथा उत्तरगंगा गाउँपालिकाको रहेको छ । प्रहरीले घटनास्थलबाट भुपेन्द्रा बुढाको लाइसेन्स र पालिकाको कार्ड फेला पारेको छ । अन्य मृतक एक जना महिला र अर्का एक जना पुरूषको सनाखत हुन बाँकी रहेको प्रहरीले बताएको छ । दुर्घटनामा घाइते भएका एक जनालाई धौलागिरि अस्पताल बागलुङमा पठाइएको छ ।

उपाध्यक्ष भुपेन्द्रा बुढा २०७९ को निर्वाचनमा नेकपा (माओवादी केन्द्र) बाट उम्मेदवार भई निर्वाचित भएकी थिइन् ।