काठमाडौं, २३ चैत । स्नो रिभर्स लिमिटेडले आयोजना प्रभावित क्षेत्रका स्थानीय बासिन्दाका लागि निष्काशन गरेको आईपीओमा आवेदन दिने आज अन्तिम दिन रहेको छ । कम्पनीले चैत ९ गतेदेखि उक्त आईपीओ खुला गरेको थियो ।

कम्पनीले जारी पूँजी ९३ करोड ७५ लाख रुपैयाँको २० प्रतिशत बराबर १८ लाख ७५ हजार कित्ता शेयर निष्काशन गर्ने अनुमति पाएको छ । यसमध्ये ९ लाख ३७ हजार ५०० कित्ता शेयर आयोजना प्रभावित क्षेत्रका बासिन्दाका लागि छुट्याइएको हो, जसको प्रति शेयर मूल्य १०० रुपैयाँ तोकिएको छ ।

स्थानीय बासिन्दामध्ये ताप्लेजुङको सिरिजङ्गा गाउँपालिका वडा नं. ८ का बासिन्दालाई ४ लाख ६८ हजार ७५० कित्ता शेयर छुट्याइएको छ । बाँकी ४ लाख ६८ हजार ७५० कित्ता शेयर सिरिजङ्गा गाउँपालिका वडा नं. १–७, सिदिङ्वा गाउँपालिका वडा नं. ५ र ६, पाथिभरा याङवारक गाउँपालिका वडा नं. ५ र ६ तथा पाँचथरको हिलिहाङ गाउँपालिका वडा नं. १ का बासिन्दालाई वितरण गरिनेछ ।

यस आईपीओमा न्यूनतम १० कित्तादेखि अधिकतम १० हजार कित्तासम्म आवेदन दिन सकिने व्यवस्था गरिएको छ ।