काठमाडौं, ११ चैत । रूसले युक्रेनमाथि पछिल्लो २४ घन्टाभित्र अहिलेसम्मकै ठूलो हवाई हमला गरेको छ । अन्तर्राष्ट्रिय सञ्चारमाध्यमका अनुसार मध्यपूर्वमा बढ्दो तनावका कारण विश्वको ध्यान अन्यत्र मोडिएका बेला रूसले आक्रमण तीव्र बनाएको संकेत देखिएको छ ।

बिबिसीका अनुसार उक्त अवधिमा रूसले युक्रेनमा ९४८ वटा ड्रोन प्रहार गरेको जनाएको छ । युक्रेनी पक्षका अनुसार मंगलबार बिहानदेखि मात्रै ५५६ ड्रोन आक्रमण भएका थिए भने दिउँसो पनि थप आक्रमण जारी रह्यो । दिउँसोको आक्रमणमा कम्तीमा तीन जनाको मृत्यु हुनुका साथै दर्जनौं घाइते भएका छन् ।

यसअघि राति गरिएको छुट्टै आक्रमणमा पाँच जनाको ज्यान गएको थियो । उक्त आक्रमणमा ३९२ ड्रोन र ३४ मिसाइल प्रयोग गरिएको युक्रेनले जनाएको छ । रूसले एकै दिनमा ठूलो मात्रामा हवाई हतियार प्रयोग गर्दै आक्रमण तीव्र बनाएको हो ।

युनेस्कोको विश्व सम्पदा सूचीमा रहेको ल्भिभस्थित १६औं शताब्दीको बर्नार्डिन मठ पनि आक्रमणबाट क्षतिग्रस्त भएको छ ।