काठमाडौ, २९ फागुन । राहदानी विभागले नयाँ प्रणालीमार्फत राहदानी जारी गर्ने तयारी भइरहेकाले राहदानी वितरण सेवा अस्थायी रूपमा प्रभावित हुन सक्ने जनाएको छ । विभागले सूचना जारी गर्दै प्रणाली परिवर्तनको प्रक्रियामा केही समय सेवा अवरुद्ध हुन सक्ने जानकारी दिएको हो ।

विभागका अनुसार राहदानी पुस्तिका लगायत आवश्यक प्राविधिक तथा प्रशासनिक तयारी पूरा भइसकेको छ । आगामी एक–दुई महिनाभित्र हाल प्रयोगमा रहेको प्रणालीबाट नयाँ प्रणालीमा रूपान्तरण गर्ने योजना रहेको विभागले जनाएको छ । प्रणाली परिवर्तनको अन्तरिम चरणमा प्रणाली पूर्ण रूपमा स्थिर नभएसम्म राहदानी वितरणमा अवरोध आउन सक्ने बताइएको छ ।

यस अवधिमा जिल्ला तथा इलाका प्रशासन कार्यालय र विदेशस्थित नेपाली नियोगमार्फत प्रदान गरिने राहदानी सेवा एकदेखि तीन सातासम्म बन्द हुन सक्ने विभागले जनाएको छ । त्यस्तै, राहदानी विभागबाट प्रत्यक्ष रूपमा प्रदान गरिने सेवा भने करिब एक सातासम्म प्रभावित हुन सक्ने उल्लेख गरिएको छ ।

नयाँ प्रणाली पूर्ण रूपमा स्थिर हुन एकदेखि तीन महिनासम्म समय लाग्न सक्ने विभागको अनुमान छ । त्यसकारण अन्तरिम अवधिमा जिल्ला वा इलाका प्रशासन कार्यालय तथा विदेशस्थित नेपाली नियोगमार्फत आवेदन दिने सेवाग्राहीले राहदानी तयार भएर प्राप्त गर्न हालको भन्दा बढी समय लाग्न सक्ने जानकारी पनि दिइएको छ ।