काठमाडौं, २८ फागुन । मध्यपूर्वमा जारी युद्धका बीच इरानले खाडी क्षेत्रका ऊर्जा पूर्वाधार र जहाजलक्षित गर्दै ड्रोन र क्षेप्यास्त्र आक्रमण तीव्र पारेपछि अन्तर्राष्ट्रिय ऊर्जा बजारमा अस्थिरता बढेको छ । बिहीबार बिहान दुई तेल ट्याङ्करमा आक्रमण भएको केही घण्टामै कच्चा तेलको मूल्य बढेर प्रतिब्यारेल १०० डलर नाघेको हो ।

इरानले खाडी क्षेत्रका देश तथा इजरायलतर्फ आक्रमण बढाएपछि क्षेत्रीय तनाव चर्किएको अन्तरराष्ट्रिय सञ्चारमाध्यमहरुले जनाएको छ । इरानले युद्ध लामो समयसम्म चल्न सक्ने चेतावनी दिएको छ । अमेरिकी राष्ट्रपति डोनाल्ड ट्रम्पले भने इरान पराजित हुने दाबी गर्दै युद्ध तत्काल समाप्त नहुने संकेत दिए ।

यसबीच लेबनानमा इजरायली आक्रमणका कारण ६३० भन्दा बढी मानिसको मृत्यु भएको र आठ लाखभन्दा बढी विस्थापित भएको बताइएको छ । खाडी क्षेत्रमा पनि सुरक्षा सतर्कता बढाइएको छ । बहराइनले नागरिकलाई घरभित्रै बस्न आग्रह गरेको छ भने साउदी अरेबियाले तेल क्षेत्रतर्फ गइरहेका ड्रोन रोकिएको जनाएको छ ।