काठमाडौं, ६ फागुन । बङ्गलादेशका प्रधानमन्त्री तारिक रहमानले चुनावी विजयपछि ५० सदस्यीय नयाँ मन्त्रिपरिषद् घोषणा गरेका छन् । सन् २०२४ को घातक विद्रोहपछि अन्तरिम प्रशासनमार्फत चलेको शासन व्यवस्थाबाट औपचारिक रूपमा जिम्मेवारी सम्हालेपछि मंगलबार उनले मन्त्रिपरिषद् सार्वजनिक गरेका हुन् । उनको मुख्य लक्ष्य संकटग्रस्त अर्थतन्त्र पुनर्जीवित गर्नु र क्षेत्रीय तथा आन्तरिक सुरक्षाका चुनौतीहरू सामना गर्नु रहेको छ ।

राजपत्रमार्फत जारी सूचीअनुसार ७६ वर्षीय अमिर खसरु महमुद चौधरीलाई वित्त मन्त्रालयको जिम्मेवारी दिइएको छ । अनुभवी सांसद र व्यापारी पृष्ठभूमिका चौधरीले लगानीकर्ता विश्वास पुनःस्थापित गर्ने जिम्मेवारी पाएका छन् ।

प्रधानमन्त्री आफैँले रक्षा मन्त्रालय सम्हालेका छन् भने विदेश मन्त्रालय खलीलुर रहमानले सम्हाल्नेछन् । भारत–बङ्गलादेश सीमा तनाव र म्यान्माबाट आएको रोहिङ्ग्या शरणार्थी संकटको पृष्ठभूमिमा नयाँ सरकार गठन भएको हो ।