काठमाडौं, ५ फागुन । जलवायु परिवर्तन न्यूनीकरणका प्रयासबीच जापान र मलेसियाले संयुक्त रूपमा सीमापार कार्बन क्याप्चर तथा भण्डारण परियोजना अघि बढाउने तयारी गरेका छन् ।

योजनाअनुसार जापानले विद्युत् उत्पादन, सिमेन्ट, इस्पात र तेल प्रशोधनजस्ता उद्योगबाट निस्कने कार्बन डाइअक्साइड सङ्कलन गरी तरलीकृत अवस्थामा मलेसिया पठाउनेछ । उक्त कार्बन बोर्नियो टापुको सारावाक क्षेत्र नजिकका समाप्त ग्यास भण्डारमा भूमिगत रूपमा भण्डारण गरिने बताइएको छ ।

सन् २०३० सम्म वार्षिक दुई करोड टन कार्बन भण्डारण गर्ने लक्ष्य राखिएको छ । जापानले सो परिमाणलाई आफ्ना कुल उत्सर्जनबाट घटाउन पाउनेछ भने मलेसियाले भण्डारण सेवाबापत आर्थिक लाभ लिनेछ । मलेसियाले आफूलाई क्षेत्रीय कार्बन भण्डारण केन्द्रका रूपमा विकास गर्ने लक्ष्यसमेत अघि सारेको छ ।