काठमाडौं, २८ माघ । राष्ट्रिय सभाबाट चलचित्र विधेयक पारित भएको छ । बुधबार बसेको राष्ट्रिय सभाको बैठकमा प्रधानमन्त्री सुशीला कार्कीको तर्फबाट महिला, बालबालिका तथा ज्येष्ठ नागरिक मन्त्री श्रद्धा श्रेष्ठले सभामा विधेयक पेश गरेकी थिइन्, जसलाई सभाले सर्वसम्मतिमा पारित गरेको हो ।

यो विधेयक तत्कालीन सञ्चार तथा सूचना प्रविधि मन्त्री पृथ्वीसुब्बा गुरूङले प्रस्ताव गरेका थिए ।

चलचित्र विधेयक पहिलो पटक २०८२ साल वैशाख १४ गते राष्ट्रिय सभामा दर्ता भएको थियो । त्यसपछि जेठ ६ गते सभामा पेस गरिएको र असार ९ गते सामान्य छलफल भएको थियो । त्यसपछि दफावार छलफलका लागि साउन १४ गते विधायन व्यवस्थापन समितिमा पठाइएको थियो । समितिले पारित गर्दै पुनः सभामा पेस गरेको थियो । यस प्रक्रियापछि विधेयक राष्ट्रिय सभाबाट पारित भएको हो ।

यो विधेयक ऐनमा रुपान्तरित भएपछि चलचित्र क्षेत्रलाई सामाजिक, सांस्कृतिक र मनोरञ्जनात्मक उद्योगको रुपमा विकास गर्न थप सहज हुने सरकारको विश्वास छ । चलचित्र मार्फत देशलाई पर्यटन गन्तव्यको रुपमा अगाडि बढाउन, स्वदेशी तथा विदेशी चलचित्र प्रदर्शन गर्नु अघि चलचित्र जाँच गर्ने व्यवस्था गर्न तथा स्वदेशी चलचित्रको विकास, विस्तार, प्रवर्धन र नियमन गर्नु विधेयकको उदेश्य रहेको छ ।