काठमाडौं, २३ माघ । रूसका एक उच्च पदस्थ सैन्य अधिकारीमाथि शुक्रबार बिहान राजधानी मस्कोस्थित एक अपार्टमेन्ट भवनमा गोली प्रहार भएको छ । गोली लागेर घाइते भएका जनरललाई तत्काल अस्पताल भर्ना गरिएको रूसी अधिकारीहरूले जनाएका हुन् । घटनालाई लक्षित हत्या प्रयासका रूपमा हेरिएको छ ।

रूसको अनुसन्धान समितिका अनुसार रूसी जनरल स्टाफमा वरिष्ठ जिम्मेवारी सम्हालिरहेका जनरल भ्लादिमिर अलेक्सेभमाथि अज्ञात व्यक्तिले घटनास्थलबाट फरार हुनु अघि पटक–पटक गोली हानेका थिए । समितिले जारी गरेको विज्ञप्तिमा पीडितको उपचार जारी रहेको उल्लेख गरिएको छ ।

घटनामा संलग्न व्यक्ति वा समूहको पहिचान खुलाइएको छैन । तर समितिले संलग्न दोषी पत्ता लगाउन सबै सम्भावित अनुसन्धान तथा खोजी प्रक्रिया अघि बढाइएको जनाएको छ ।

सन् २०२२ फेब्रुअरीमा युक्रेनमाथि रूसी आक्रमण सुरु भएयता धेरै उच्च तहका रूसी सैन्य अधिकारीहरू आक्रमणमा परेका छन्, जसमध्ये केही घटनाको जिम्मेवारी युक्रेनले स्वीकार गरेको छ ।