काठमाडौं, १५ माघ । रिज लाइन इनर्जी लिमिटेडले सर्वसाधारण लगानीकर्ताका लागि माघ २८ गतेदेखि प्राथमिक शेयर (आईपीओ) निष्कासन गर्ने भएको छ । यसअघि आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीका लागि निष्कासन गरिएको आईपीओको बाँडफाँट सम्पन्नपछि दोस्रो चरणमा सर्वसाधारणलाई सेयर बिक्री गर्न लागिएको हो ।

कम्पनीले जारी पुँजी १ अर्ब १८ करोड ५० लाख रुपैयाँको २२ प्रतिशत बराबर हुने २६ करोड ७ लाख रुपैयाँ मूल्यको २६ लाख ७ हजार कित्ता आईपीओ निष्कासन गर्न नेपाल धितोपत्र बोर्डबाट अनुमति पाएको थियो । सोमध्ये ११ लाख ८५ हजार कित्ता आईपीओ आयोजना प्रभावित क्षेत्रका स्थानीय बासिन्दा र १ लाख ४२ हजार २०० कित्ता वैदेशिक रोजगारीमा रहेका नेपालीहरूका लागि छुट्याई बाँडफाँट गरिसकेको छ ।

अब कम्पनीले २८ हजार ४४० कित्ता कर्मचारीका लागि र ७१ हजार १०० कित्ता सामूहिक लगानी कोषका लागि छुट्याएर बाँकी रहेको ११ लाख ८० हजार २६० कित्ता आईपीओ सर्वसाधारण लगानीकर्तालाई निष्कासन गर्न लागेको हो । यस आईपीओको मूल्य ११ करोड ८० लाख २६ हजार रुपैयाँ रहेको छ भने प्रतिकित्ता मूल्य १०० रुपैयाँ तोकिएको छ ।

आईपीओमा लगानीकर्ताले न्यूनतम १० कित्तादेखि अधिकतम ५० हजार कित्तासम्म आवेदन दिन सक्नेछन् । छिटोमा फागुन ४ गते निष्कासन बन्द हुनेछ भने पर्याप्त आवेदन नपरेमा फागुन १३ गतेसम्म खुला रहनेछ ।