काठमाडौं, ७ माघ । नेपाली बजारमा बुधबार सुनको मूल्य ह्वात्तै बढेको छ । अघिल्लो कारोबार दिनको तुलनामा आज सुन तोलामा १० हजार ४ सय रुपैयाँले बढेर नयाँ रेकर्ड बनाएको हो ।

नेपाल सुनचाँदी व्यवसायी महासंघका अनुसार आज छापावाल सुन प्रतितोला २ लाख ९५ हजार १०० रुपैयाँमा कारोबार भईरहेको छ । अघिल्लो कारोबार दिन मंगलबार छापावाल सुन तोलामा २ लाख ८४ हजार ७ सय रुपैयाँमा कारोबार हुँदै नयाँ नयाँ रेकर्ड बनाएको थियो, जुन आज नै तोडिएको छ ।

यस्तै आज चाँदीको मूल्य पनि बढेको छ । मंगलबार प्रतितोला ५ हजार ८८० रुपैयाँमा कारोबार भएको चाँदी आज ५ हजार ९२० रुपैयाँ कायम भएको महासंघले जनाएको छ ।