काठमाडौं, २४ पुस । विजय लघुवित्त वित्तीय संस्था लिमिटेडद्वारा जारी गरिएको थप सार्वजनिक निष्काशन (एफपीओ)मा आवेदन दिने समय आज सकिँदैछ । पुस २१ गतेदेखि खुला गरिएको उक्त एफपीओमा लगानीकर्ताले आज (पुस २४ गते)सम्म आवेदन दिन सक्नेछन् ।

संस्थापक र सर्वसाधारण शेयरधनीबीच ७०ः३० को शेयर स्वामित्व संरचना कायम गर्ने उद्देश्यले लघुवित्तले एफपीओ जारी गरेको हो । यसअघि साविकको नयाँ सारथी लघुवित्त वित्तीय संस्था र विजय लघुवित्त वित्तीय संस्था मर्ज भएपछि संस्थाको चुक्ता पूँजी ७४ करोड ५० लाख ४० हजार ३५९ रुपैयाँ पुगेको थियो । मर्जपछि संस्थापक र सर्वसाधारण समूहको शेयर स्वामित्व अनुपात ७४ दशमलव ३९ प्रतिशत र २५ दशमलव ६१ प्रतिशत रहेको थियो, जसलाई सन्तुलनमा ल्याउन एफपीओ निष्काशन गरिएको हो ।

लघुवित्तले प्रतिशेयर १०० रुपैयाँ अंकित मूल्यमा ४ लाख ६६ हजार ८१७ कित्ता साधारण शेयर निष्काशन गरेको छ, जसको मूल्य ४ करोड ६६ लाख ८१ हजार ७०० रुपैयाँ बराबर रहेको छ ।

एफपीओमा आवेदन दिने सर्वसाधारण लगानीकर्ताले न्यूनतम १० कित्तादेखि अधिकतम १ हजार कित्तासम्म शेयरका लागि आवेदन दिन सक्ने व्यवस्था गरिएको छ ।