काठमाडौं, २ मंसिर । नेपाल प्रिमियर लिग (एनपीएल) सिजन–२ को दोस्रो दिनको आजको खेलमा चितवन राइनोजले कर्णाली याक्सलाई ४ विकेट पराजित गरेको छ । १६७ रनको लक्ष्य पछ्याएको चितवनले १९ ओभर १ बलमा ६ विकेट गुमाउँदै आवश्यक रन पूरा गर्‍यो ।

चितवनका लागि रवि बोपारा उत्कृष्ट प्रदर्शन गर्दै ३५ बलमा ५२ रनको अर्धशतक प्रहार गरे । उनीसँगै दीपक बोहराले ४२ रन, सैफ जैबले ३८ रन र कुशल मल्लले २० रनको योगदान दिए । कर्णालीका बलरमध्ये सोमपाल कामीले २ विकेट लिए भने युनिस सिंह ठकुरी, मार्क वाट र युवराज खत्रीले एक–एक विकेट हात पारे ।

यसअघि टीयू मैदानमा टस हारेर पहिले ब्याटिङ गरेको कर्णालीले निर्धारित २० ओभरमा ३ विकेटको क्षतिमा १६६ रन जोडेको थियो । टोलीका ओपनर प्रियांक पन्चाल आजको खेलका उत्कृष्ट स्कोर बने– उनले ४८ बलमा ७ चौका र ६ छक्कासहित ९० रन प्रहार गरे । म्याक्स ओुडाउडले २० रन, मार्क वाटले १६ रन जोडे । अन्तिमतर्फ पवन सरार्फ २७ रन र नजिबुल्लाह जद्रान ४ रनमा अविजित रहँदै टोलीको योगफल १६६ पुर्‍याए ।